ជនសង្ស័យឆក់ទូរសព្ទដៃពីជនជាតិបរទេសបានសម្រេច​ ត្រូវកម្លាំងនាយកដ្ឋាននគរបាលព្រហ្មទណ្ឌ ធ្វើការបង្ក្រាបបានភ្លាមៗ

(ភ្នំពេញ) ៖ នៅថ្ងៃទី០២ ខែឧសភា ឆ្នាំ២០២៤ វេលាម៉ោង​ ០៣ ៖ ៣៥ នាទី​ទៀបភ្លឺ លោកឧត្តមសេនីយ៍ត្រី ប៊ុត វណ្ណារដ្ឋ អនុប្រធាននាយកដ្ឋានទទួលផែន បានដឹកនាំកម្លាំងជំនាញការិយាល័យព្រហ្មទណ្ឌកម្រិតធ្ងន់​ ដែលមានលោក​វរសេនីយ៍ឯក​ ញ៉ែម​ វ៉ន​ នាយការិយាល័យព្រហ្មទណ្ឌកម្រិតធ្ងន់​ ដោយមានការចូលរួមពី លោកវរសេនីយ៍ទោ ប៊ុត ស៊ីម៉េង នាយការិយាល័យ​ ចុះល្បាតតាមបណ្តោយផ្លូវ​លេខ៦៧ ក្នុងសង្កាត់ផ្សារថ្មីទី១ ខណ្ឌដូនពេញ រាជធានី​ភ្នំពេញ​ ក៏ប្រទះឃើញជនរងគ្រោះដែលជាជនបរទេស (អាហ្វ្រិក) កំពុងប្រតាយប្រតប់គ្នាជាមួយជនសង្ស័យម្នាក់ ក្នុងចំណោមបក្ខពួក ចំនួន ០៤ នាក់ ដែលបានធ្វើសកម្មភាពឆក់ទូរសព្ទដៃរបស់គាត់​ ។

ភ្លាម​នោះ កម្លាំងជំ​នាញ​ការិយាល័យ ធ្វើការឃាត់ខ្លួនជនសង្ស័យម្នាក់ នៅកន្លែងកើតហេតុឈ្មោះ​ ហ៊ន​ វណ្ណៈ​ ហៅ​ ឡយ ភេទប្រុស អាយុ ៤៥ ឆ្នាំ ជនជាតិខ្មែរ មុខរបរមិនពិតប្រាកដ ទីកន្លែងស្នាក់នៅផ្ទះជួលម្តុំផ្លូវ២០០៤ ផ្លូវបេតុង សង្កាត់កាកាបទី១ ខណ្ឌពោធិ៍សែនជ័យ រាជធានីភ្នំពេញ ។ រីឯបក្ខពួក ចំនួន ០៣ នាក់ទៀត បានយកទូរសព្ទដៃរបស់ជនរងគ្រោះ​ រត់គេចខ្លួនបាត់ ។

បច្ចុប្បន្ន​ កម្លាំងជំនាញ បាននាំជនសង្ស័យខាងលើមកនាយកដ្ឋាននគរបាលព្រហ្មទណ្ឌ​ ដើម្បីធ្វើការសាកសួរ​ និងកសាងសំណុំរឿងបញ្ជូនទៅអយ្យការអមសាលាដំបូងរាជធានីភ្នំពេញ ចាត់ការតាមនីតិវិធី ៕