ស្ត្រីម្នាក់ត្រូវបានស្លាប់ភ្លាមៗនៅនឹងកន្លែងកើតហេតុ ដោយសារតែដំរីព្រៃ បោកយ៉ាងអាណោចអាធម៌

(មណ្ឌលគិរី) ៖ ស្ត្រីម្នាក់ ត្រូវគេរាយការណ៍មកថា បានស្លាប់ ក្រោយសត្វដំរីព្រៃ ចាប់បោក ពេលដើររកទំពាំងក្នុងភូមិសាស្ត្រអូរដំរីផុង នាភូមិអូរអាម ឃុំស្រែខ្ទុម ស្រុកកែវសីមា ខេត្តមណ្ឌលគិរី ករណីខាងលើនេះ បានកើតឡើង នៅវេលាម៉ោង ០៩ ៖ ៣០ នាទីព្រឹក ថ្ងៃទី១៤ ខែមេសា ឆ្នាំ២០២៤ ចំថ្ងៃបុណ្យចូលឆ្នាំថ្មីនេះ ។

យោងតាមរបាយការណ៍របស់កម្លាំងនគរបាលស្រុកកែវសីមា បានឱ្យដឹងថា នៅចំណុចអូរដំរីផុង ស្ថិតក្នុងភូមិអូរអាម ឃុំស្រែខ្ទុម ស្រុកកែវសីមា ខេត្តមណ្ឌលគិរី មានករណីស្លាប់ ចំនួន ០១ នាក់ ដោយសពមានឈ្មោះ សែម ស៊ីណាត ភេទស្រី អាយុ ៣៨ ឆ្នាំ រស់នៅភូមិអូរអាម ឃុំស្រែខ្ទុម ស្រុកកែវសីមា ខេត្តមណ្ឌលគិរី ទីកន្លែងកំណើតស្ថិតនៅក្នុងភូមិមេម៉ង់ ឃុំមេម៉ង់ ស្រុកមេមត់ ខេត្តកំពង់ចាម តាមការសាកសួរពីបងប្អូនសាច់ញាតិរបស់សព បានឱ្យដឹងថា សព និងប្ដី បានទៅរកទំពាំងនៅចំណុចអូរដំរីផុង ពេលនោះក៏បំបែកគ្នារកទំពាំង បន្តិចក្រោយមកក៏ឃើញប្រពន្ធ ត្រូវបានដំរីចាប់បោកបណ្ដាលឱ្យស្លាប់ភ្លាមៗនៅនឹងកន្លែងកើតហេតុ ហើយប្ដីក៏បានតេទូរសព្ទហៅបងប្អូនឱ្យមកជួយ ។

បច្ចុប្បន្ន សពត្រូវបានក្រុមគ្រួសារដឹកយកទៅធ្វើបុណ្យតាមប្រពៃណី នៅឯស្រុកកំណើតភូមិ មេមង ឃុំមេមង ស្រុកមេមត់ ខេត្តត្បូងឃ្មុំ ៕