ហេតុការណ៍គ្រោះថ្នាក់នេះ បានកើតឡើង កាលពីវេលាម៉ោង ០៣ ៖ ៤០ នាទី រសៀល ថ្ងៃទី១០ ខែមេសា ឆ្នាំ២០២៤ នៅតាម បណ្ដោយផ្លូវភ្នំពេញហាណូយ កែងផ្លូវ១៩៧០ ក្នុងសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ។
ជនរងគ្រោះដែលបានស្លាប់មានឈ្មោះ មាន ស៊ីម៉ាក់ អាយុ ២៩ ឆ្នាំ មុខរបរកម្មកររោងចក្រកាត់ដេរ ស្នាក់នៅបន្ទប់ជួល ស្ថិតក្នុងសង្កាត់ឃ្មួញ ខណ្ឌសែនសុខ ។ ចំណែកស្ត្រីជាប្រពន្ធរងរបួស មិនទាន់ស្គាល់អត្តសញ្ញាណឡើយ ។ អ្នកទាំងពីរបានជិះម៉ូតូម៉ាកស៊ុយសុគីនិច ពណ៌ស លាយខៀវ ពាក់ផ្លាកលេខ ត្បូងឃ្មុំ 1F-2048 ។
យោងតាមសាក្សី បានឱ្យដឹងថា នៅមុនពេលកើតហេតុ គេឃើញជនរងគ្រោះ បានជិះម៉ូតូ ០១ គ្រឿង ឌុបគ្នាធ្វើដំណើរ ក្នុងទិសដៅពីត្បូងទៅជើង ក្នុងល្បឿនលឿនល្មម ពេលមកដល់ចំណុចកើតហេតុ ជាផ្លូវបំបែកជាបួន ស្រាប់តែមានរថយន្តដឹកសិស្ស របស់សាលា BONAMARY UNIVERSITY ម៉ាកហ៊ីយ៉ាន់ដាយ ពាក់ផ្លាកលេខ 3G-3858 មួយគ្រឿង ធ្វើដំណើរចេញពីផ្លូវលេខ១៩៧០ ឆ្លងកាត់ទទឹងផ្លូវ ។ ភ្លាមៗនោះ ជនរងគ្រោះ ក៏វ៉ាក់ហើយជាន់ហ្វ្រាំងបង្ខំ បណ្តាលឱ្យដួលហើយជនរងគ្រោះ ចូលក្រោមកង់រថយន្តកិនបែកក្បាលស្លាប់យ៉ាងអាណោចអធ័ម ។ ចំណែកស្ត្រីជាប្រពន្ធ បានរងរបួស ត្រូវបានបញ្ជូនទៅសង្គ្រោះ ។
បន្ទាប់ពីកើតហេតុ អ្នកបើកបររថយន្តឈ្មោះ ឯម សំណាង អាយុ ២៩ ឆ្នាំ ត្រូវបានសមត្ថកិច្ចឃាត់ខ្លួន យកទៅប៉ុស្តិ៍ ដើម្បីចាត់ការតាមច្បាប់ ៕
No comments:
Post a Comment